Mitropoliti Anastas: Policia të heqë dorë nga dhuna dhe arbitrariteti!
Mitropoliti Anastas ka bërë thirrje urgjente policisë për të ndalë dhunën dhe arbitraritetin mbi qytetarët, duke theksuar se përgjegjësia e tyre shkon edhe përpara gjykimit të historisë.
Përshkallëzimi i dhunës shtetërore dhe cenimi i hapësirave të shenjta ka nxitur një reagim të fortë e të drejtpërdrejtë edhe nga Mitropoliti Anastas, i cili i ka bërë thirrje urgjente Policisë shtetërore për të ndalë menjëherë goditjet e dhunshme dhe arbitraritetin mbi qytetarët. Në mesazhin e tij publik, ai ka lëshuar një paralajmërim të prerë për urdhëruesit dhe ekzekutuesit e dhunës, duke theksuar se keqpërdorimi i pushtetit dhe autoritetit shtetëror do të përballet jo vetëm me drejtësinë ligjore, por edhe me ndëshkimin historik e moral. “Policia e Shtetit të rikthehet menjëherë në binarët e ligjit dhe të heqë dorë nga çdo formë dhune e arbitrariteti. Ata që shpërdorojnë autoritetin e shtetit duhet ta dinë se përgjegjësia e tyre nuk përfundon përpara ligjit, por shtrihet edhe përpara gjykimit të historisë. Mbi ta do të rëndojë gjithashtu përgjegjësia për çdo pasojë që mund të sjellë përshkallëzimi i mëtejshëm i tensioneve.”