Ardit Bido: Policia është organ force, nëse kalon kufijtë duhet pezulluar

Gazetari Osman Stafa ka debatuar me deputetin e PS, Ardit Bido, këtë të enjte në studion e “Top Story”. Gazetari u ndal te arrestimet gjatë protestës, ku përmendi dhe dhunën e përdorur nga policia. Nga ana tjetër, deputeti socialist u shpreh se një polic që kalon kufijtë që i cakton ligji, atëherë duhet pezulluar. Stafa e pyeti Bido: “Si arreston një person pa prova?” Bido u përgjigj: “Shoqërohen, nuk arrestohen. Policia e Shtetit është organ force.” Komentoi edhe Koka: “Ne e dimë që policia e Shtetit na mbron, nuk na dhunon.” Bido shtoi: “Nëse një polic i caktuar tejkalon kufijtë që cakton ligji, atëherë ai duhet pezulluar. Por nuk mund të bëhet pis këtu policia e Shtetit se ka pasur dhunë. Çdo qytetar që dhunon duhet të dënohet. Policia mund ta përdorë forcën.” Stafa tha: “Nuk ka pronarë kjo protestë. Është shpirti i qytetarëve. Shteti ka për detyrë mbarëvajtjen e protestës. Nuk ka detyrë të dhunojë qytetarët.” Bido u përgjigj: “Nëse kemi parë një qytetar që është dhunuar pa ushtruar dhunë, ai polic që e dhunoi është pezulluar.”