Zbardhet djegia e makinës në Vlorë, në pranga porositësi dhe autori i dyshuar

Policia e Vlorës ka zbardhur një rast të dyshuar si djegie e makinës, duke arrestuar dy persona, njëri i dyshuar si porositës dhe tjetri si autor i djegies. Ngjarja ndodhi më 22 shtator, kur një automjet u dogj në lagjen "1 Maji" në Vlorë. Fillimisht, ngjarja u raportua si aksidentale për shkak të një defekti teknik në motorin e automjetit, por nga veprimet intensive hetimore u zbulua se automjeti ishte djegur qëllimisht. Në kuadër të operacionit të koduar "Order", u arrestuan shtetasit R. K., 33 vjeç dhe T. K., 36 vjeç, të banues në Vlorë. Shtetasi R. K. dyshohet se ka porositur shtetasin T. K., për djegien e automjetit në pronësi të shtetases S. N., 50 vjeçe, banuese në Vlorë. Vijojnë hetimet për dokumentimin e plotë ligjor të këtij rasti. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale "Shkatërrimi i pronës me zjarr", kryer në bashkëpunim.