Gazetarja bullgare shtyhet në tokë nga oficeri i sigurisë së kryetares së Parlamentit, përfundon në spital

Gazetarja bullgare Sonya Koltuklieva është shtyhet në tokë nga një oficer i Shërbimit Kombëtar të Mbrojtjes (NSO) jashtë selisë së partisë "Bullgaria Progresive" në Sofje. Ngjarja ka shkaktuar reagime të forta politike dhe thirrje për dorëheqjen e kryetares së Parlamentit, Mihaela Dotsova, dhe kreut të NSO-së, Emil Tonev.

Koltuklieva po trajtohet për dhimbje të forta në shpatull dhe mund të ketë nevojë për ndërhyrje kirurgjikale. Mjekët po kryejnë gjithashtu ekzaminime të mëtejshme për të përjashtuar dëmtime të brendshme.

Ngjarja ndodhi të enjten, kur gazetarja po përpiqej t’i drejtonte pyetje Dotsovës lidhur me seancat parlamentare për një falje presidenciale kontroverse. Pamjet që qarkullojnë në internet tregojnë Koltuklievën duke hapur derën e automjetit të kryetares së Parlamentit, përpara se një oficer sigurie ta shtyjë atë prapa, duke e rrëzuar në trotuar. Më pas, autokolona largohet nga vendi i ngjarjes.

Gazetarja ka treguar se kujton rënien në tokë, ndërsa më vonë ka përjetuar të përziera, dhimbje koke dhe dhimbje të forta në shpatull. Fillimisht ajo mori trajtim në Akademinë Ushtarake Mjekësore të Sofjes, për t’u shtruar më pas në spitalin “Shën Sofia”.

Prokuroria Ushtarake ka nisur procedurat paraprake, ndërsa oficeri i përfshirë, Martin Varadinov, ka dhënë deklaratën e tij. Paralelisht, Shërbimi Kombëtar i Mbrojtjes ka hapur një hetim të brendshëm për incidentin.

Kryetarja e Parlamentit, Mihaela Dotsova, e cilësoi ngjarjen të papranueshme dhe i shprehu keqardhje gazetares. Ajo deklaroi se ishte tronditur kur Koltuklieva hapi derën e automjetit dhe se nuk e kishte parë saktësisht se çfarë ndodhi më pas. Dotsova u zotua se do të kërkonte transparencë të plotë dhe hetim të veprimeve të oficerit.

Edhe presidentja Iliana Yotova, e cila mbikëqyr NSO-në, dënoi veprimet e oficerit, duke theksuar se gazetarët duhet të jenë në gjendje të ushtrojnë profesionin e tyre lirisht dhe pa frikë.

Incidenti ka nxitur gjithashtu reagime të forta në politikën bullgare, ku partia GERB ka bërë të ditur se po mbledh nënshkrime për thirrjen e një seance të jashtëzakonshme parlamentare dhe përpjekjen për shkarkimin e Dotsovës nga posti i kryetares së Parlamentit.