Denis Meçe, i akuzuar për vrasjen e Egli Progës, arrestohet për shkeljen e masës "arrest në shtëpi"

Denis Meçe, një nga të akuzuarit për vrasjen e Egli Progës në Pogradec, është arrestuar pasi dyshohet se ka shkelur masën "arrest në shtëpi". Ai ishte nën masë të sigurisë "arrest në shtëpi" gjatë procesit gjyqësor për vrasjen e Progës.

Sipas burimeve policore, Meçe është konstatuar jashtë banesës, duke lëvizur me automjet, në kundërshtim me vendimin e gjykatës. Së bashku me të, është arrestuar edhe një kushëriri i tij, i dyshuar për veprimin penal të moskallëzimit të krimit.

Meçe ishte nën masën e sigurisë "arrest në shtëpi", ndërsa ndaj tij dhe të tjerëve akuzuar për vrasjen e Progës vijon procesi gjyqësor.

Vetëm pak ditë më parë, Gjykata e Korçës rrëzoj kërkesën e të akuzuarve për gjykim të shkurtuar, duke vendosur që çështja të shqyrtohet sipas procedurës së zakonshme.

Ngjarja e rendë ndodhi më 10 gusht 2024, në një lokal në Pogradec, ku Egli Proga humbi jetën. Për këtë krim, Denis Meçe dhe Leonidha Gjoci akuzohen për veprimin penal të vrasjes me dashje, të kryer në bashkëpunim.

Të dy të akuzuarit ndodheshin nën masën e sigurisë "arrest në shtëpi", ndërsa Meçe dyshohet se e ka shkelur këtë masë.

Ndërkohë, tre të tjerëtë akuzuar, Arjan Manellari, Voltan Shkulaku dhe Andi Shkulaku, akuzohen për moskallëzim krimi dhe janë nën masën e sigurisë "detyrim paraqitjeje".

Si ndodhi vrasja e Egli Progës?

Sipas të dhënave të dosjes, ngjarja nisi pas një debati mes Denis Meçes, nipit të Valter Gores, ish-drejtor i Postës Shqiptare, dhe Egli Progës.

Meçe i kishte kërkuar disa herë 42-vjeçarin që t'i dridhte një cigare. Pasi Proga ia kishte përgatitur, i kishte kërkuar që të shkonte ta merrte. Në atë moment, Meçe kishte hyrë në lokal, ku mes tyre kishte nisur një debat.

Sipas dinamikës së përshkruar në dosje, gjatë konfliktit Proga është goditur nga Leonidha Gjoci. Me pas, pasi ka dalë jashtë lokalit, Denis Meçe dyshohet se e ka goditur me grusht 42-vjeçarin, duke bërë që ky i fundit të përplaste kokën fillimisht në një automjet të parkuar dhe më pas në asfalt.

Pak minuta pas incidentit, në vendngjarje ka mbërritur ambulanca, e cila e ka transportuar Progën drejt spitalit, ku është konfirmuar vdekja e tij.

Ekspertiza mjeko-ligjore ka përcaktuar se shkaku i vdekjes ishte hemorragjia në cipën e trurit dhe hemorragjia në indin trunor.