Vllaznia mposhtet në ndeshjen hapëse të javës së 9-të të Abissnet Superiore

Vllaznia ka dalë e mundur nga përballja me Vorën, në një ndeshje ku vendasit treguan më shumë saktësi përpara portës dhe shfrytëzuan momentet vendimtare për të siguruar fitoren 2-1.

Vora kaloi në avantazh që në minutën e 16-të, kur Kashari realizoi me një goditje nga distanca, duke mposhtur portierin shkodran. Pas këtij momenti, vendasit krijuan edhe mundësi të tjera për të dyfishuar rezultatin, por nuk arritën t'i konkretizonin.

Vllaznia kërkonte të reagonte përmes Balajt dhe Muratajt, të cilët krijuan raste përpara portës kundërshtare. Megjithatë, portieri Harizaj ndërhyri në momentet vendimtare dhe ruajti avantazhin e Vorës.

Edhe në pjesën e dytë, shkodranët kërkuan golin e barazimit, por gabuan në finalizim. Vora, nga ana tjetër, priti momentin për të goditur sërish.

Në minutën e 85-të, Frroku ndërtoi një aksion individual dhe shërbeu për Dakën, i cili dërgoi topin në rrjetë, duke dyfishuar rezultatin në 2-0.

Vllaznia reagoi vetëm katër minuta më vonë. Në minutën e 89-të, pas ndërhyrjes së Shehit, arbitri akordoi penallti për shkodranët. Balaj mori përsipër ekzekutimin dhe shënoin, duke ngushtuar diferencën në 2-1.

Por goli erdhi shumë vonë. Vllaznia nuk arriti të krijojë një tjetër mundësi vendimtare në minutat e mbetura, ndërsa Vora administroi avantazhin dhe siguroi fitoren.

Kështu, golat e Kasharit dhe Dakës i dhanë Vorës tri pikë, ndërsa Vllaznia u largua nga fusha me një humbje, pasi nuk arriti të kthente në gola rastet që krijoi gjatë takimit.