PD bojkoton Konferencën e Kryetarëve për buxhetin 2027: Nuk na janë vënë në dispozicion dokumentet

Grupi parlamentar i Partisë Demokratike ka bojkotuar mbledhjen e Konferencës së Kryetarëve për buxhetin 2027, duke kundërshtuar mënyrën se si është organizuar procesi i prezantimit të projekt-buxhetit të shtetit për vitin 2027. Deputetët e PD kanë deklaruar se deri në mesnatën para mbledhjes, nuk u ishte vënë në dispozicion asnjë dokument lidhur me projekt-buxhetin, përfshirë projekt-ligjet, relacionet shpjeguese dhe dokumentacionin financiar shoqërues.

Sipas deklaratës për shtyp të PD, mbledhja është njoftuar vetëm pasditen e një dite më parë, në kundërshtim me Nenin 12, pika 3, të Rregullores së Kuvendit, që parashikon se mbledhjet e Konferencës së Kryetarëve, si rregull, zhvillohen jo më herët se 48 orë nga njoftimi.

Partia Demokratike ka cilësuar këtë procedurë si pengesë për ushtrimin e kontrollit parlamentar dhe ka ngjallur dyshime se mbledhja synon të shërbejë më shumë si një aktivitet propagandistik i qeverisë sesa si një diskutim për financat publike. Deputetët e PD kanë theksuar se nuk kundërshtojnë shqyrtimin e buxhetit, por kërkojnë që dokumentacioni i plotë t'u vihet menjëherë në dispozicion deputetëve dhe të përcaktohet një kalendar që garanton kohë të mjaftueshme për analiza, diskutime dhe amendamente.

PD ka drejtuar gjithashtu një apel kryetarit të Kuvendit që të garantojë respektimin e procedurave parlamentare dhe të drejtat e të gjithë deputetëve.