Shoqata e Transportit Qytetas kërkon përjashtim nga taksa e re e qarkullimit dhe akciza

Shoqata Kombëtare e Transportit Qytetas ka paraqitur qeverisë një paket propozimesh për lehtësimin e barrave fiskale të sektorit, duke përfshirë përjashtimin nga taksat e reja të qarkullimit dhe akcizat, si dhe një normë të reduktuar të TVSH-së për shërbimet e transportit publik.

Shoqata kërkon që autobusët e regjistruar dhe të licencuar për transport publik të përjashtohen shprehimisht nga detyrimi i ri i takses së qarkullimit, nëse ai do të aplikohet si taksë vjetore mbi automjetet. Sipas shoqatës, taksat aktuale të qarkullimit mbi gazoilin janë 32 lekë për litër, pa përfshirë efektin e TVSH-së, duke përbeërë një zë të drejtpërdrejtë të kostove të operatorëve.

Shoqata argumenton se operatorët e transportit publik nuk mund të përshtatin në mënyrë të njëanshme tarifat sipas luhatjeve të çmimit të karburantit, pasi shërbimi funksionon mbi tarifa dhe itinerare të përcaktuara. Për këtë arsye, shoqata kërkon që heqja ose rimbursimi i akcizës të karburantit të përdorur nga operatorët e licencuar të transportit publik qytetas.

Shoqata kërkon gjithashtu shqyrtimin e aplikimit të një norme të reduktuar të TVSH-së prej 6% për shërbimet e transportit publik qytetas të udhëtarëve. Kërkesa vjen në kuadër të propozimeve fiskale që, sipas dokumentit të shoqatës, parashikojnë rritjen e normave standarde të TVSH-së nga 20% në 21%.