Kurti para delegacionit parlamentar të NATO-s: Anëtarësimi i Kosovës, prioritet strategjik

Kryeministri Albin Kurti ka riafirmuar se anëtarësimi i Kosovës në NATO mbetet prioritet strategjik për sigurinë dhe paqen në rajon. Këtë qëndrim e shprehu të enjten gjatë takimit me delegacionin e Komisionit Politik të Asamblesë Parlamentare të NATO-s, të përbërë nga 11 anëtarë prej 9 shteteve të ndryshme. Sipas njoftimit të kryeministrit, në takim u diskutua për bashkëpunimin me Aleancën Veriatlantike, zhvillimin demokratik, përparimin ekonomik dhe situatën e sigurisë në Kosovë dhe rajon. “Për Republikën e Kosovës anëtarësimi në NATO është prioritet strategjik, që i shërben paqes së qëndrueshme dhe sigurisë afatgjatë të Ballkanit Perëndimor dhe mbarë Evropës”, deklaroi Kurti. Ai bëri të ditur se me delegacionin u diskutua edhe për ngritjen e kapaciteteve mbrojtëse të Forcës së Sigurisë së Kosovës (FSK), si dhe aftësimin profesional të ushtarakëve në përputhje me politikat dhe standardet e NATO-s. Delegacioni i Asamblesë Parlamentare të NATO-s po qëndron për vizitë në Kosovë më 28 dhe 29 tetor. Një ditë më parë, përfaqësuesit e tij u pritën nga kryetarja e Kuvendit, Albulena Haxhiu. Delegacioni udhëhiqej nga nënkryetari i Asamblesë Parlamentare të NATO-s, Alberto Losacco, dhe kryetari i Komisionit Politik, Sverre Myrli. Haxhiu theksoi rëndësinë historike të ndërhyrjes së NATO-s në Kosovë më 1999, duke e cilësuar atë vendimtare për përfundimin e luftës, masakrave dhe spastrimit etnik të kryer nga regjimi i Serbisë. Gjatë takimit u diskutua edhe për situatën e sigurisë, sulmin në Banjskë, kërcënimet hibride e të tjera.