Italia në alarm për protestat e fuqishme në mbi 50 qytete
Protesta të fuqishme priten në mbi 50 qytete të Italisë, ndërsa autoritetet kanë përforsuar masat e sigurisë për të parandaluar incidente.
Italia po përgatitet për një ditë të protestave dhe mobilizimeve në shkallë kombëtare, ndërsa sindikatat e bazës kanë thirrur një grevë të përgjithshme kundër luftës, politikave të riarmatimit dhe shtrenjtimit të jetës. Më shumë se 50 manifestime janë planifikuar në qytete të ndryshme, ndërsa autoritetet kanë hartuar plane të posaçme të sigurisë për të garantuar zhvillimin paqësor të tubimeve dhe për të parandaluar incidentet.
Vëmendja kryesore është qendruar në Romë, ku dhjetëra mijëra qytetarë pritet të marrin pjesë në marshimin që nis nga sheshi i Republikës. Autoritetet shqetësohen për mundësinë që grupe protestuesish të devijojnë drejt zonës së Circus Maximus, ku të premten në mëngjes është planifikuar inaugurimi i aktivitetit ushtarak “Villaggio Difesa” në kuadrin e festimeve për 4 Nëntorin, Ditën e Unitetit Kombëtar dhe të Forcave të Armatosura.
Kjo zonë ishte qendra e vëmendjes edhe të shtunën e kaluar, kur forcat e rendit u ndërhynën për të ndryshuar itinerarin e një manifestimi të paautorizuar të organizuar nga lëvizja studentore dhe grupe aktivistësh. Autoritetet nuk përjashtojnë mundësinë e një situate të ngjashme gjatë protestave të reja.
Një tjetër zhvillim që mund të ndikojë në klimën e protestave është lirimi nga paraburgimi i Youssef Siher, i arrestuar nën dyshimin se kishte nxitur trazirat e 17 dhe 18 tetorit në Milano përmes kanalin të tij në rrjetet sociale, “Movimento 17 ottobre”. Një gjyqtar vendosi të mos e konfirmojë arrestimin e tij lidhur me akuzën për nxitje të veprave penale me qëllime terroriste, duke urdhëruar lirimin e menjëhershëm.
Përveç Romës, autoritetet kanë identifikuar si zona që kërkojnë vëmendje të shtuar edhe Milanon, Torinon, Bolonjen, Padoven, Napolin, Firencen dhe Xhenoven. Në këto qytete pritet të organizohen manifestime me pjesëmarrjen e lëvizjeve studentore, qendrave sociale dhe organizatave pacifiste. Autoritetet parashikojnë kufizime të përkohshme të qarkullimit në disa zona qendrore, ndërsa forcat e sigurisë do të mbikëqyrin veçanërisht ndërtimet dhe institucionet publike.
Shqetësimi kryesor lidhet me mundësinë që grupe të dhunshëm të përfshihen në tubime dhe të shkaktojnë përplasje, megjithëse organizatorët kanë paralajmëruar protesta kundër politikave të qeverisë dhe rritjes së kostos së jetës.