34% e bashkive të Shqipërisë do të çojnë mbetjet në Shkodër

Shkodra parashikohet të jetë destinacioni kryesor për mbetjet e 21 bashkive në të gjithë vendin, të cilat shtrihen në të tretën e territorit të Shqipërisë. Sipas projekt-buxhetit 2027, drejt zonës së menaxhimit të mbetjeve Shkodër do të orientohen jo vetëm bashkitë e veriut, por edhe ato të qarkullave Elbasan dhe Fier, që ndodhen qindra kilometra larg.

Të dhënat tregojnë se 34% e bashkive të vendit që përfshinë gjithashtu një të tretën e territorit të vendit do të depozitojnë mbetjet në Bashkinë e Shkodrës dhe për këto do të marrin financime shtesë në buxhetin e shtetit.

Përveç problemave mjedisore në kryeqendrën e Veriut, menaxhimi i mbetjeve në këtë mënyrë do të ketë një kosto të jashtëzakonshme të transportit, p.sh. nga Librazhdi në Shkodër, duke marrë në konsiderata edhe trafikun e rënduar. Një kamion që niset nga Perrenjasi me mbetje i duhet të qëndrojë disa orë në trafikun e Elbasanit dhe me tej disa të tjerë në Tiranë dhe në Lezhë.

Sipas planit të qeverisë, 21 bashki janë përfshirë në zonën e menaxhimit të mbetjeve Shkodër. Ato përfshinë 34.4% të bashkive të Shqipërisë dhe shtrihen në rreth 9,625 kilometra katrorë, ose afërsisht 33.5% të territorit kombëtar.

Në grupin e parë përfshihen bashkitë Malësia e Madhe, Shkodër, Vau i Dejës, Pukë, Fushë-Arrëz, Lezhë dhe Kurbin. Por lista zgjerohet edhe me bashkitë Librazhd, Elbasan, Rrogozhinë, Peqin, Cërrik, Belsh, Perrenjas dhe Gramsh, të cilat sipas dokumentit do të financohen për transportin e mbetjeve drejt zonës së Shkodrës.

Të njëjtin destinacion kanë edhe bashkitë Fier, Lushnjë, Roskovec, Patos, Divjakë dhe Mallakastër.

Përshkrimi i bashkive të Shqipërisë në zonën e menaxhimit të mbetjeve Shkodër ngre pyetje për mënyrën e organizimit të transportit, distancat që duhet të përshtatojnë mjetet dhe kostot financiare që do të krijohen për pushtetin vendor, për shkak edhe të kaosit në trafik.

Fondet shtesë për transportin e mbetjeve drejt Shkodrës do të akordohen në formën e transfertës së pakushtëzuar sektoriale. Shpërndarja sipas bashkive është mbështetur në dy kritere, sasinë vjetore të mbetjeve dhe kostot shtesë të transportit drejt pikave fundore të grumbullimit dhe përpunimit.

Kjo nënkupton se buxheti i shtetit do të mbështesë financiarisht transportin e mbetjeve, por bashkitë do të duhet të kontribuojnë edhe me të ardhurat e tyre për të përballe kostot.

Përveç Shkodrës, dokumenti përcakton zonën e menaxhimit Tiranë për gjashtë bashki, Krujë, Durrës, Vorë, Kamëz, Shijak dhe Kavajë.

Në zonën e Gjirokastrës përfshihen dhjetë bashki, ndërsa gjashtë bashki të tjera janë orientuar drejt zonës së menaxhimit Korçë.