Veliaj ndryshime të reja në Bashkinë Tiranë, liron nga detyra dy nënkryetarë

Kryetari i Bashkisë së Tiranës, Erion Veliaj, ka vendosur lirimin nga detyra të dy nënkryetarëve, Vasilika Vjero dhe Ilir Mëngra. Në vend të tyre, Etleva Bisha është emëruar në detyrën e nënkryetares së Bashkisë. Etleva Bisha ka një profil të spikatur politik dhe profesional, duke u konsoliduar në vitet e fundit si eksperte e pushtetit vendor. Ajo është një nga themelueset e FRESH-it dhe ka qenë pjesë e reformimit të shërbimeve sociale gjatë drejtimit të ministrisë nga Erion Veliaj. Emërimi i saj bashkon përvojën politike, përkushtimin ndaj vlerave socialiste dhe ekspertizën e lartë profesionale në administrimin e pushtetit vendor.