Veliaj shkarkon dy nënkryetarët e Bashkisë së Tiranës, pas përplasjes me Ramën

Kryetari i Bashkisë së Tiranës, Erion Veliaj, ka liruar nga detyra dy nënkryetarët, Vasilika Vjeron dhe Ilir Mëngren. Në vend të tyre, është emëruar Etleva Bisha, një e njohur e Partisë Socialiste dhe e administratës publike. Bisha ka qenë një nga themeluesit e FRESH-it dhe ka marrë pjesë në reformimin e shërbimeve sociale gjatë periudhës kur Veliaj drejtonte ministrinë e shërbimeve sociale.

Ndryshimet në Bashkinë e Tiranës marrin edhe një dimension politik, për shkak të zhvillimeve të një dite me parë dhe përplasjes së Veliaj me institucionet shtetërore për transferimin e tij në Burgun e Fierit. Mund të shihet edhe si mesazh politik, për t'i treguar Ramës që ka ende fuqi.

Kryebashkiaku u transferua në mënyrë të beftë në këto institucion, ndërsa sipas raportimeve është vendosur për dhjetë ditë në regjim survejimi, në një dhomë pa dritare. Drejtoria e Përgjithshme e Burgjeve ka reaguar pas transferimit, duke deklaruar se vendimi përmban informacion të klasifikuar si sekret shtetëror dhe se nuk mund të bëhet publik arsyet e masës.

Veliaj ka reaguar ashpër ndaj këtij qëndrimit, duke kërkuar dokumentacionin që justifikon klasifikimin e vendimit. "U deshën 31 ore që më në fund të na thuhet se vendimi është sekret! Pra, jo vetëm që nuk na vihet në dispozicion akti, por synohet të na mohohet edhe mundësia për ta njohur, kundërshtuar dhe ankimuar efektivisht atë. Atëherë kalojmë në faqen tjetër të kësaj maskarade: nga arbitrariteti i vendimmarrjes te fshehja e saj pas sekretit shtetëror! Na vini në dispozicion autorizimin e Kryeministrit të vendit që ju autorizon si autoritet klasifikues", deklaroi Veliaj.

Media që s’e dorëzon pavarësine e saj, i paraprine një qeverisje te ndershme. Pamfleti është një platformë mediatike analitike që u “lind” si domosdoshmëri e një tribune pa kompromis, si një zë i fuqishëm në luftën pa ekuivok ndaj krimit dhe korrupsionit politik në Shqipëri.