Dhoma Britanike kundër rritjes së taksave: Rrezikohen investimet, kërkon shtyrje deri në 5 vjet

Dhoma Britanike e Tregtisë në Shqipëri (BCCA) ka kërcënuar qeverinë të rishikojë ndryshimet e propozuara në Paketin Fiskal 2027, duke paralajmëruar se rritja e tatimit mbi dividendin, ndryshimet në TVSH dhe ulja e pragut të regjistrimit mund të rendojnë bizneset, të ndikojnë investimet dhe të rrisin kostot për konsumatorët.

Një nga shqetësimet kryesore të BCCA-së lidhet me propozimin për rritjen e tatimit mbi dividendin nga 8% në 15%. Sipas organizatës, ndryshimi përfaqëson një ndërhyrje të rendesishme në trajtimin fiskal të kthimit të kapitalit dhe mund të ndikojë drejtpërdrejt vendimet e kompanive për shpërndarjen e fitimeve, riinvestimin dhe financimin e aktivitetit.

BCCA kërkon që qeveria të rishikojë propozimin dhe të shqyrtojë mundësinë e një rritjeje graduale, në vend të kalimit menjëhershëm në normën 15%. Në analizën duhet të merren parasysh edhe marrëveshjet për shmangien e tatimit të dyfishtë, trajtimin i fitimeve të akumuluar dhe ndikimi të investitorëve vendas dhe të huaj.

Një tjetër ndryshim që ngre shqetësim është propozimi për rritjen e normës standarde të TVSH-së nga 20% në 21%. Dhoma Britanike kërkon një analizë të plotë të ndikimit që kjo masë mund të ketë mbi çmimet e produkteve dhe shërbimeve, fuqinë blerëse të konsumatorëve dhe konkurrueshmërinë e bizneseve.

Sipas BCCA-së, ndryshimet në normat e TVSH-së nuk mund të analizohen të izoluar, pasi efektet e tyre ndërthuren me njëra-tjetrënë. Organizata vlerëson pozitivisht objektivin për uljen e barrave të konsumit për produktet bazë ushqimore, por kërkon që të monitorohet nëse ulja e TVSH-së do të reflektohet realisht në çmimet përfundimtare.

Turizmi, shqetësim për rritjen e TVSH-së për akomodim nga 6% në 10%

Një vëmendje veçante i kushtohet sektorit të turizmit, ku propozohet rritja e TVSH-së për shërbimet e akomodimit nga 6% në 10%. Sipas Dhoma Britanike, kjo masë mund të ndikojë kontratat e lidhura paraprakisht për sezonet e ardhshme, marzhet operative të bizneseve dhe konkurrueshmërinë e Shqipërisë në tregun rajonal.

Problemi lidhet veçanërisht me kontratat turistike, ku çmimet mund të jenë përcaktuar përpara ndryshimeve fiskale. Në këto raste, bizneset mund të mos kenë mundësi ta transferojnë menjëherë koston shtesë te klientët, duke u përballur me një reduktim të marzheve të fitimit.

Për këto arsye, BCCA kërkon që ndryshimet të shoqërohen me dispozita kalimtare, veçanërisht për kontratat ekzistuese dhe investimet që janë tashmë në proces.

Ulja e pragut të TVSH-së në 5 milionë lekë, kosto të reja për bizneset e vogla

Dhoma Britanike ngre shqetësim edhe për propozimin që pragu i regjistrimit në TVSH të ulët nga 10 milionë në 5 milionë lekë.