Supersfida e Egnatia-Teuta: Sherri mes tifozëve në tribunat e "Arena Egnatia"

Pamje aspak të hijshme janë regjistruar në supersfidën e javës së Abissnet Superiore mes Egnatias dhe Teutës. Teksa në fushë po zhvillohej dueli për kreun e kampionatit, në tribunat e "Arena Egnatia" situata ka dalë jashtë kontrollit, me disa tifozë që janë përfshirë në një përplasje fizike me grushte.

Ende nuk dihet nëse bëhet fjalë për një konflikt mes tifozëve të Egnatias dhe atyre të Teutës, apo nëse përplasja ka ndodhur mes mbështetësve të skuadrës vendase. Incidenti ka njollosur një përballje të rëndësishme të kampionatit, e cila përfundoi me fitoren minimale 1-0 të Egnatias. Skuadra e drejtuar nga Nevil Dede mori tri pikët e plotë, duke i shkaktuar Teutës humbjen e parë sezonale dhe duke marrë kryesimin e renditjes.

Ndërsa në fushë Egnatia festonte një fitore me peshë në garën për titull, skenat e dhunës në tribuna hodhën hije mbi spektaklin sportiv. Kampionët në fuqi mbeten pretendentë për të fituar titullin e katërt radhazi, ndërsa Teuta dhe Dinamo vijojnë të jenë gjithashtu në garën për kreun.