I riu shqiptar gjobitet me 10 mijë euro në Itali për transportin e automjeteve
Një 26-vjeçar shqiptar është gjobitur me 10 mijë euro në Itali për transportin e dy automjeteve drejt Shqipërisë me një kamion frigoriferik.
Ngjarja u regjistrua në autostradën A14, pranë daljes së Cattolica-s, ku efektivët e Policisë Rrugore të Forlì-t ndaluan mjetin për kontroll. Kamioni ishte i pajisur për transport izotermik të ushqimeve të ftohta, por në rimorkio kishte ngarkuar një automjet tip SUV dhe një makinë tjetër që ishin të destinuara për një blerës në Shqipëri. Gjatë kontrollit, policia konstatoi se drejtuesi nuk dispononte licencat dhe autorizimet e nevojshme për transportin e automjeteve. Për më tepër, 26-vjeçari drejtonte mjetin pa pasur kategorinë e duhur të lejes së drejtimit dhe nuk kishte regjistruar në tahograf certifikimin e tij profesional. Tahografi është pajisja që registon kohën e drejtimit të automjetit dhe periudhat e pushimit të shoferit. Për shkeljet e konstatuara, ai u gjobit me 10 mijë euro, ndërsa policia i pezulloi edhe lejen e drejtimit.