Formula 1/ Leclerc lë pas Mercedesin, Ferrari nis me ritëm të lartë në Meksikë

Piloti i Ferrarit, Charles Leclerc, e ka nisur në mënyrën më të mirë fundjavën e Çmimit të Madh të Meksikës, duke regjistruar kohën më të shpejtë në sesionin e parë të provave të lira. Leclerc ndali kronometrin në 1 minutë, 18 sekonda dhe 128 të mijëtat, duke lënë pas Kimi Antonellin e Mercedesit me një diferencë prej 659 të mijëtash.

Sesionin e parë të provave të lira e zhvilluan në kushte të veçanta, pasi dhjetë nga njëmbëdhjetë skuadrat, në zbatim të rregullores, u dhanë mundësinë pilotëve të rinj dhe rezervë të merrnin pjesë në vend të pilotëve titullarë. Ferrari ishte përjashtimi i vetëm nga ky rotacion. Mercedes zuri edhe vendin e tretë me danezin Frederik Vesti, i cili zëvendësoi George Russell dhe e përfundoi sesionin 0.733 sekonda pas Leclerc. Lewis Hamilton u rendit i katërti, ndërsa pesëshen e parë e plotësoi japonezi Ayumu Iwasa me Red Bullin e Max Verstappen, 0.985 sekonda larg kohës më të mirë.

Pas tyre u renditën Pierre Gasly me Alpine, Fernando Alonso me Aston Martin dhe Oscar Piastri me McLaren. Dhjetëshen e parë e plotësuan Oliver Bearman me Haas dhe Arvid Lindblad me Racing Bulls.

Në këtë sesion morën pjesë edhe dy pilotë të rinj italianë. Gabriele Minì përfundoi në vendin e 14-të me Alpine, duke zëvendësuar Franco Colapinton, ndërsa Leonardo Fornaroli u rendit i 17-ti në timonin e McLarenit të Lando Norris. Për Fornarolin, seanca nuk kaloi pa probleme, në një debutim që kërkonte përshtatje me makinën dhe pistën.

Vëmendje tërhoqi edhe Nikola Tsolov, i cili zëvendësoi Liam Lawson te Racing Bulls. Piloti bullgar regjistroi kohën e 12-të më të shpejtë, duke lënë pas disa emra të rëndësishëm, por u detyrua të kthehej në bokse drejt fundit të sesionit për shkak të një problemi fizik, pasi ndjeu mpirje në njërën këmbë. Nga sesioni i dytë i provave të lira, makinat do t’u rikthehen pilotëve titullarë, ndërsa skuadrat do të vijojnë përgatitjet për pjesën tjetër të fundjavës në Meksikë.