Zelensky: Rusia pretendon se ka pushtuar gjysmën e Donbasit, Putin jeton në një realitet tjetër

Presidenti ukrainas, Volodymyr Zelensky, ka zbuluar detaje nga negociatat trepalëshe të zhvilluara në Abu Dhabi, që synojnë avancimin drejt një marrëveshjeje për fundin e konfliktit tashmë mbi 4 vjecar. Zelensky u shpreh se përfaqësuesit rusë pretendojnë se kanë pushtuar gjysmën e territorit të Donbasit që aktualisht kontrollohet nga Ukraina. "Ata më thanë se rusët besojnë dhe deklarojnë se tashmë kanë pushtuar gjysmën e Donbasit që ende kontrollohet nga ne. Ekipi ynë iu përgjigj: 'Nuk e dime se nga dilni me pretendime të tilla. Kemi pamje filmike, fotografi dhe dëshmi të tjera që tregojnë se këto territore janë ende nën kontrollin tonë'", u shpreh ai. Rusia kontrollon një pjesë të konsiderueshme të rajonit të Donbasit, ndërsa në të kaluarën ka kërkuar që Ukraina t’ia dorëzojë të gjithë territorin si pjesë e një marrëveshjeje të mundshme paqeje. Kievi i ka kundërshtuar vazhdimisht këto kërkesa. Mospërputhjen mes pretendimeve të dy palëve, Zelensky e përshkroi si një nga pengesat kryesore në negociata, duke shtuar se shefi i Kremlinit, Vladimir Putin, "jeton në një realitet tjetër". Sipas presidentit ukrainas, edhe pala amerikane ka konfirmuar qëndrimin e delegacionit të Kievit lidhur me kontrollin e këtyre territoreve. Zelensky vlerësoi se këto mospajtime dëshmojnë se negociatat në Abu Dhabi, në formatin aktual ku marrin pjesë dhe të dërguar të presidentit Donald Trump, nuk janë të mjaftueshme për të zgjidhur çështjet kryesore të luftës. Sipas tij, për të arritur përparim konkret drejt paqes, është e nevojshme që negociatat të zhvillohen drejtpërdrejt mes liderëve të vendeve të përfshira.