Kërcënime për shfarosjen e italianëve nëpër shkolla italiane

Alarmi për bombë në rreth 6 mijë shkolla në Itali u nis rreth orës 11:00, kur në adresat elektronike të mijëra shkollave mbërriti një mesazh i nënshkruar nga një person që prezantohej si Mikhail Antropov, udhëheqës i të ashtuquajturit “Vilayet i Misoginistanit”. Në e-mail u shkruhej: “Kemi ardhur për t’ju shfarosur. Do të vëmë në zbatim një gjenocid kundër italianëve”. Autori pretendonte gjithashtu se brenda ndërtesave shkollore ishte vendosur një “eksploziv i fuqishëm”, i fshehur në një qese plastike dhe i pajisur me “aktivizim në distancë”. Kërcënimet nuk kufizoheshin vetëm te institucionet arsimore. Në të njëjtin mesazh, dërguesi pretendonte se kishte vendosur edhe një bombë në automjetin e kryeministres italiane. Pas marrjes së kërcënimeve, kryeministrja italiane Giorgia Meloni thirri një mbledhje për të garantuar sigurinë dhe për të vlerësuar situatën. Mesazhet shkaktuan shqetësim në shkolla, ku pati evakuime dhe momente paniku. Megjithatë, situata duket se është kthyer në normalitet, ndërsa autoritetet vijojnë të mbajnë në vëmendje rastin.