Devolli Corporation dhe IHG Hotels & Resorts në partneritet për mega projekti hotelier në Mal të Zi
Devolli Corporation dhe IHG Hotels & Resorts kanë zyrtarizuar një partneritet strategjik për zhvillimin e mega projektit InterContinental Resort Tivat në Mal të Zi, një resort luksoz me pesë yje në Gjirin e Kotorrit.

Devolli Corporation ka zyrtarizuar sot partneritetin strategjik me IHG Hotels & Resorts për zhvillimin e mega projektit InterContinental Resort Tivat, një resort luksoz me pesë yje në Gjirin e Kotorrit, në Mal të Zi. Ky bashkëpunim shënon një hap të rëndësishëm në strategjinë e zgjerimit të Devolli Corporation në sektorin e patundshmërisë dhe turizmit ndërkombëtar.
Projekti do të zhvillohet nën brendin prestigjioz InterContinental, pjesë e portofolit të IHG Hotels & Resorts, i cili do të menaxhojë hotelin përmes një kontrate 32-vjeçare. Hapja e hotelit planifikohet për vitin 2030. Resorti do të përfshijë një ofertë të pasur të shërbimeve dhe hapësirave rekreative, duke përfshirë spa ekskluzive, pishina të jashtme dhe pishinë në çati, restorant kryesor me tarracë dhe restorant à la carte, lobby bar, spa bar dhe beach bar, kopshte dhe hapësira të gjelbra në çati, dhe hapësira të dedikuara për relaksim dhe argëtim.
Një komponent i rëndësishëm i InterContinental Resort Tivat janë edhe 225 rezidencat private, me një sipërfaqe të përgjithshme prej rreth 18,000 m², të cilat do të zhvillohen në tri faza. Rezidencat do të ofrojnë njësi me një, dy dhe tri dhoma gjumi, si dhe apartamente dupleks, të pajisura me tarraca private dhe pamje drejt detit.
Partneriteti me IHG Hotels & Resorts përfaqëson një element kyç të projektit, duke bashkuar vizionin investues të Devolli Corporation me përvojën dhe ekspertizën ndërkombëtare të një prej operatorëve më të njohur të hotelerisë në botë.