Kreditë e buta për banesa në Tiranë, 1737 fitues të rinj
Bashkia e Tiranës ka miratuar listën e 1737 fituesve të rinj të programit për subvencionimin e interesave të kredive për blerjen e banesës në kryeqytet.
Këshilli Bashkiak i Tiranës ka miratuar listën e 1737 fituesve të rinj të programit për subvencionimin e interesave të kredive për blerjen e banesës në kryeqytet. Kjo listë është miratuar në mbledhjen e muajit tetor të Këshillit Bashkiak, duke i hapur rrugën vijimit të procedurave për marrjen e kredive të buta.
Programi i subvencionimit të interesave të kredive është zbatuar prej disa vitesh nga Bashkia e Tiranës dhe ka qenë një nga nismat e para të kryebashkiakut Erion Veliaj në fillim të detyrës së tij, me synimin për të lehtësuar aksesin në strehim për individët dhe familjet që kanë të vështirë të përballojnë kostot e blerjes së një apartamenti.
Përmes këtij mekanizmi, përfitesit mbështeten financiarisht për të marrë kredi bankare për blerjen e banesës, duke përfituar subvencionimin e një pjesë të interesave nga shteti. Kredia shlyhet me një normë interes prej 3%, duke ulur barrën financiare mujore për familjet përfitesuese krahasuar me kushtet standarde të kreditimit në treg.
Pas miratimit të listës nga Këshilli Bashkiak, 1737 fituesit mund të paraqiten pranë bankave të nivelit të dytë me të cilat Bashkia e Tiranës ka marrëveshje bashkëpunimi, për të vijuar procedurat e aplikimit dhe përfiteshmërisë së kredisë së butë.
Përfitimi i kredisë mbetet i kushtëzuar nga plotësimi i kritereve të vlerësimit bankar, ndërsa shuma që mund të financohet për secilin aplikues përcaktohet në bazë të numrit të anëtarëve të familjes dhe kritereve të tjera të programit.
Miratimi i listës vjen në një periudhë kur blerja e një apartamenti në Tiranë është gjithnjë e më e kushtueshme, si pasojë e rritjes së çmimeve të pasurive të paluajtshme gjatë viteve të fundit. Kjo situatë ka vështirësuar aksesin në tregun e banesave, veçanërisht për çifte të reja dhe familjet me të ardhura të ulëta apo mesatare, të cilat shpesh nuk kanë mundësi të përballojnë këto kushte mujore të një kredisë me normat e zakonshme të interesit.
Në këto kushte, subvencionimi i interesave të kredisë përmbën një instrument mbështetës për uljen e kostos së financimit dhe krijimin e mundësive më të favorshme për blerjen e një banese. Me miratimin e 1737 përfitesve të rinj, programi i kredive të buta vijon të mbetet një nga instrumentet e politikave sociale të strehimit në Bashkinë e Tiranës, duke u dhënë mundësi familjeve të përzgjedhura të hedhin hapin drejt sigurimit të një banese në pronësi.