Taksa e pronës do të ndryshojë sërish: Rritje e shkallës për apartamentet dhe vilat e dyta

Qeveria do të ndryshojë sërish shkallën e taksës për pronën në projektligjin për pasuritë e paluajtshme, sipas burimeve zyrtare. Shkalla e taksës për ndërtesat rezidenciale do të rritet nga 0.05% në intervale nga 0.1 deri në 0.2%. Për banesën e parë do të vijojë të aplikohet zbritja e 50% të vlerës së pronës si e patatueshme, por kjo vlerë nuk duhet të kalojë një prag, vlera e të cilëve përcaktohet sipas bashkive.

Për banesat e dyta, projektligji nuk parashikon zbritje. Pra, apartamenti apo vila do të taksohet për të gjithë vlerën e saj me shkallët e reja të taksimit që pritet të ndryshojnë nga propozimet fillestare.

" Për banesat e tjera nuk do të zbatohet kjo lehtësi dhe taksa llogaritet mbi bazën e vlerës së tyre të plotë të taksueshme", ka sqaruar më herët Drejtoria e Taksës së Pasurisë për Monitor.

Edhe prej këtyre ndryshimeve më të prekurit do të jenë pronarët e banesave të dyta, të vilave në bregdet apo të apartamenteve që qëndrojnë bosh në Tiranë, që mund të jenë prona që mbahen nga ndërtuesit.

Zbatimi i formulës së re për ndërtesat, sipas afatave që përcakton projektligji i publikuar për konsultim nga Financat, pritet të nisë nga 2029 dhe nga 2030 për trojet dhe tokën bujqësore.

Një nga ndryshimet më të rendësishme të reformës së taksës së pasurive të paluajtshme lidhet me bazën e llogaritjes së taksës. Të dhënat për 3 milionë pasuri të paluajtshme do të jenë të regjistruara në Kadastrën Fiskale.

Hedhja e këtyre të dhënave ndër vite ishte edhe arsyeja kryesore, që Ministria e Financave u tërhoq nga zbatimi i taksës së re pas draftit të propozuar në 2023.

Drejtorja e Përgjithshme e Taksës së Pasurisë për llogaritjen e taksës më herët sqaroi për Monitor se vlera e vlerësuar e pasurisë do të pasqyrojë vlerën e përafërt të tregut të asaj pasurie.